Общие > Բարձրագույն խումբ.Ամփոփում > GANDZASAR FC

Բարձրագույն խումբ.Ամփոփում

Հայաստանի Բարձրագույն խմբի 32-րդ տուրից հետո առաջնությունում 3 ամսյա դադար կլինի: 2013թ. գարնանը թիմերը կանցկացնեն ևս 10 տուր:

32-րդ տուրում անակնկալ մատուցեցին ետնապահները` «Բանանցը» ու «Արարատը»: Վերջինս հյուրընկալվելիս կարողացավ պարտության մատնել «Իմպուլսին», իսկ ահա «Բանանցը» սեփական հարկի տակ ոչ-ոքի խաղաց «Շիրակի» հետ:

32-րդ տուր
«Ուլիս»-«Միկա»` 0:1
«Իմպուլս»-«Արարատ»` 0:1
«Փյունիկ»-«Գանձասար»` 1:1
«Բանանց»-«Շիրակ»` 2:2

Մրցաշարային աղյուսակ

Թիմեր	Խ	Հ	Ո	Պ	ԽԳ	ԲԳ	Մ
1.Շիրակ	32	21	6	5	56	31	69
2.Միկա	32	20	6	6	49	32	66
3.Իմպուլս	32	14	6	12	54	49	48
4.Գանձասար	32	13	9	10	35	28	48
5.Փյունիկ	32	14	4	14	53	45	46
6.Ուլիս	32	8	8	16	33	43	32
7.Բանանց	32	4	12	16	33	50	24
8.Արարատ	32	7	3	22	21	56	24

Տուրն անցավ հյուրերի առավելությամբ, որոնք հաղթեցին 2 խաղում, նույնքան անգամ էլ գրանցվեց ոչ-ոքի: Առաջնությունում կայացած 128 հանդիպումներում դաշտի տերերը հաջողության են հասել 61 անգամ, հյուրերը տոնել են 40 հաղթանակ, 27 խաղ ավարտվել է ոչ-ոքի:

4 խաղում խփվեց 8 գոլ, որից միայն 3-ը բաժին հասավ դաշտի տերերին: Առաջնության 128 հանդիպումներում գրանցվել է 334 գոլ: Միջին արդյունավետությունը կազմում է 2,6 գոլ:

"Փյունիկի" և "Գանձասարի" մրցավեճում ընթացիկ առաջնությունում առաջին անգամ ոչ-ոքի արդյունք գրանցվեց: Իսկ մինչ այդ կայացած 4 հանդիպումներից 3-ում հաղթել էր "Գանձասարը":

Վերջին 2 հանդիպումներում Դավիթ Մանոյանը դաշտից չի հեռանում առանց գոլի: Նախորդ տուրում "Իմպուլսի" հետ խաղում Մանոյանը խփեց հաղթական գնդակը, իսկ "Գանձասարի" հետ մրցավեճում դիպուկ իրացնելով 11մ հարվածը, "Փյունիկին" փրկեց պարտությունից:

"Փյունիկն" ընթացիկ առաջնությունում 5-րդ անգամ 11մ հարվածի իրավունք ստացավ: Դրանցից 4-ն ավարտվել են դարպասի գրավմամբ: Բացի Մանոյանից, որն առաջին անգամ իրացրեց 11մ հարվածը, 2 անգամ դիպուկ է գտնվել Սարգիս Հովսեփյանը, մեկ անգամ էլ դարպասը գրավել է Վիուլեն Այվազյանը: Իսկ ահա Արտակ Եդիգարյանի հարվածից հետո գնդակը հետ է մղվել դարպասաձողից:
"Գանձասարը" 4-րդ անգամ պատժվեց 11մ հարվածով: Արսեն Բեգլարյանի դարպասին նշանակված բոլոր հարվածներն էլ ավարտվել են գոլով:

Արա Խաչատրյանը "Գանձասարում" հոբելյանական' 100-րդ հանդիպումն անցկացրեց: Նա դարձավ կապանցիների կազմում 100 խաղի սահմանագիծը հատած 6-րդ ֆուտբոլիստը: Նրանից ավելի շատ հանդիպումներ "Գանձասարի" մարզաշապիկով անցկացրել են Արմեն Տատինցյանը (159), Բենիամին Մանուչարյանը (126), Կարեն Զաքարյանը (111), Վահե Դավթյանը (109) և Անդրանիկ Սարգսյանը (104):

04.12.2012